Uandikishaji orodha ya wapiga kura waanza rasmi Newala

Posted on: October 8th, 2019

Mwenyekiti wa Halmashauri ya Wilaya ya Newala Mhe. Chitwanga Ndembo, leo tarehe 08/10/2019 amezindua rasmi zoezi la uandikishaji wa wapiga kura katika daftari la orodha ya wapiga kura kwa kujiandikisha katika kituo cha Miembeni kilichopo kwenye kijiji cha Mkwaya, kata ya Mtunguru, Halmashauri ya Wilaya ya Newala.

Mhe. Ndembo amewataka wakazi wa Mkwaya na Newala kwa ujumla kujitokeza mapema kujiandikisha katika orodha ya wapiga kura na wasisubiri siku ya mwisho.

Kwa Halmashauri ya Wilaya ya Newala jumla ya wakazi wenye sifa za kupiga kura 78,174 wanatarajiwa kujiandikisha kwenye orodha ya wapiga kura kwa muda wa siku saba kuanzia tarehe 08 hadi tarehe 14/10/2019.

Aidha, uandikishaji huu ni kwa ajili ya uchaguzi wa Serikali za mitaa, vijiji na vitongoji unaotarajiwa kufanyika tarehe 24/11/2019.