Maadhimisho ya wiki ya utumishi wa umma yafana Halmashauri ya Wilaya ya Newala

Posted on: June 25th, 2019

Halmashauri ya Wilaya ya Newala leo Jumanne tarehe 25 Juni 2019 imefanya kilele cha maadhimisho ya wiki ya utumishi wa umma katika viwanja vya ukumbi wa mikutano wa Halmashauri ya Wilaya ya Newala.

Maadhimisho hayo ambayo mgeni rasmi alikuwa Mhe. Mkuu wa Wilaya ya Newala Bi. Aziza Mangosongo yalienda sambamba na maonesho ya shughuli na utoaji wa huduma wa idara na vitengo vyote vya Halmashauri ya Wilaya ya Newala.

Maadhimisho hayo yamefanywa kwa Idara na Vitengo hivyo kukutana na watumishi katika maeneo ya kazi na kusikiliza maoni na changamoto wanazokutana nazo katika utekelezaji wa majukumu yao na wadau mbalimbali kujua shughuli zinazotekelezwa na Halmashauri kwa ujumla.

Mhe. Mangosongo aliweza kukagua, kuona na kupata maelezo kuhusu shughuli zinazofanywa na idara na vitengo mbalimbali kwa kukagua meza maalum zilizopangwa kuonesha shughuli hizo.

Maadhimisho hayo yalihudhuriwa pia na Mkurugenzi Mtendaji wa Halmashauri ya Wilaya ya Newala Bw. Mussa Chimae, Kamati ya ulinzi na usalama ya Wilaya ya Newala, mwakikishi wa Katibu wa chama cha mapinduzi Wilaya ya Newala, Wakuu wa Idara na Vitengo, watumishi wa Halmashauri ya wilaya ya Newala, waandishi wa Habari na wananchi kwa ujumla.

Kauli mbiu ya maadhimisho ya wiki ya utumishi wa umma kwa mwaka huu 2019 ni "Uhusiano kati ya uwezeshaji wa vijana na usimamizi wa masuala ya uhamiaji: Kujenga utamaduni wa Utawala Bora, matumizi ya TEHAMA na ubunifu katika utoaji wa huduma jumuishi."