Kamati ya siasa ya Mkoa wa Mtwara yaridhishwa na utekelezaji wa ilani ya CCM Halmashauri ya Wilaya ya Newala

Posted on: February 4th, 2020

Kamati ya siasa ya Mkoa wa Mtwara ikiongozwa na Mwenyekiti wa Chama cha Mapinduzi wa Mkoa wa Mtwara Ndugu Yusufu Nannila leo tarehe 04/02/2020 imefanya ziara katika Halmashauri ya Wilaya ya Newala.

Ziara hiyo imehusisha ukaguzi wa miradi ya maendeleo inayotekelezwa ikiwa ni ahadi ya CCM katika kuwaletea wananchi maendeleo.

"Nchi nzima, sisi wenyeviti wa CCM Mkoa tunazunguka kwenye miradi hii ya mkakati na ya kawaida kuangalia jinsi ambavyo Serikali ya awamu ya tano imeweza kupeleka miradi katika kila eneo." Amesema ndugu Nannila.

Akihitimisha ziara hiyo kwa Wilaya ya Newala, ndugu Nannila ameeleza kuwa moja ya utaratibu wa sherehe ya mwaka huu 2020 ya kufikisha miaka 43 tangu kuanzishwa kwa Chama cha Mapinduzi ni kuangalia pesa za Serikali  zilizokwenda kwenye miradi ya maendeleo zimefanya nini.

"Niipongeze Serikali yangu ya Chama cha Mapinduzi, chini ya Mhe. Rais wangu na mwenyekiti wangu wa Chama cha Mapinduzi Dkt John Pombe Joseph Magufuli kwa sababu haya si kwamba amefanya Kitangari na Newala tu, amefanya nchi nzima." Amesema ndugu Nannila.

Ziara ya kamati ya siasa ya Mkoa wa Mtwara katika Halmashauri ya Wilaya ya Newala imehusisha ukaguzi wa mradi wa ujenzi wa chuo cha ualimu Kitangari uliogharimu shilingi bilioni nane na milioni mia mbili na sitini na tisa na ujenzi wa nyumba ya walimu mbili kwa moja, vyumba viwili vya madarasa na matundu sita ya vyoo katika shule ya msingi Sijaona iliyopo katika kata ya Mtopwa wenye thamani ya shilingi milioni tisini na sita na laki sita.